Bakıda reabilitasiya mərkəzində uşaqlara işgəncə verilməsi ilə bağlı yeni görüntülər üzə çıxıb, polis bir neçə əməkdaşı dindirilməyə aparıb. Bu haqda 3 sentyabr tarixində BakuPlus.az məlumat verib.
Sosial şəbəkələrdə yayılan kadrlarda mərkəzin üç əməkdaşının azyaşlıya qarşı zorakılıq etməsi müşahidə olunur.
“Polis əməkdaşları mərkəzdə araşdırma aparırlar. Mərkəzin bir neçə əməkdaşı dindirilmə üçün Nizami Rayon Polis İdarəsinə aparılıb. Hazırda mərkəzə giriş dayandırılıb, nə uşaqlar, nə də valideynlər içəri buraxılır. Bildirilir ki, uşaqlara işgəncə verən şəxs mərkəzin Aytac adlı əməkdaşı olub”, - “Azərbaycan Uşaqlar Birliyi”nin sədri Kəmalə Ağazadə bildirib.
Bu gün səhər saatlarında, məlum video yayılandan sonra bir qrup valideyn mərkəzə gəlib. Valideynlərlə mərkəz əməkdaşları arasında qarşıdurma baş verib.
Həmçinin təmizlik işçisi uşaqlara qarşı zorakılıq olan bağçada eşitdikləri barəsində danışıb. O, hər gün bağçadan uşaqların ağlama səsləri gəldiyini və tərbiyəçilərin onları döydüyünü iddia edib.
