Narkotik alverinə qarşı daha bir genişmiqyaslı əməliyyat paytaxtın Xətai rayonunda keçirilib. Bu haqda bu gün, 10 sentyabr tarixində Daxili İşlər Nazirliyinin mətbuat xidməti məlumat yayıb.
Əhmədli, NZS, Həzi Aslanov qəsəbələri, eləcə də Mirzə Davud, Məhəmməd Hadi küçələri və digər ərazilərdə ümumilikdə 27 nəfər saxlanılıb.
Araşdırma zamanı məlum olub ki, saxlanılan bir neçə nəfər əvvəllər məhkum olunub. Həmin şəxslərdən və yaşadıqları evlərdən külli miqdarda müxtəlif növ narkotik vasitələr aşkar edilib. Həmin şəxslər narkotik vasitələrdən istifadə etməklə yanaşı, göstərilən ərazilərdə satışını da təşkil ediblər.
Saxlanılan şəxslərin cinayət əlaqələrinin müəyyən edilməsi, o cümlədən Xətai rayonu ərazisində narkotik vasitələrin qanunsuz dövriyyəsi ilə məşğul olan digər şəxslərin tutulması istiqamətində polis əməkdaşları tərəfindən əməliyyat-axtarış tədbirləri davam etdirilir.
