Bakıda ər arvadını küçədə tutaraq bıçaqlayıb. Bu haqda 6 sentyabr tarixində Oxu.az məlumat verib.
Bakıda həyat yoldaşını öldürməyə cəhd etməkdə təqsirləndirilən 54 yaşlı Müxalif Balayevin cinayət işi üzrə məhkəmə prosesi başa çatıb. Məhkəmə prosesində Balayev ittiham üzrə özünü təqsirli bilib. Məhkəmənin hökmü ilə o, 15 il müddətinə azadlıqdan məhrum olunub.
Belə ki, Xəzər rayonu, Türkan qəsəbəsində yaşayan, əvvəllər məhkum olunmuş Müxalif Balayev həyat yoldaşı, 42 yaşlı Cəmalə Balayeva ilə mübahisə edərək onu bıçaqlayıb. Xəstəxanaya çatdırılan yaralının həyatını xilas etmək mümkün olub.
Məhkəmə zamanı Müxalif Balayev ifadəsində bildirib ki, baş vermiş hadisənin səbəbi arvadının ondan küsərək atasının evinə getməsi və qayıtmaq təkliflərini dəfələrlə rədd etməsi olub. Hadisə günü spirtli içki qəbul edən Müxalif arvadını evə qaytarmaq fikrinə gəlib və onu qorxutmaq üçün özünlə mətbəx bıçağı götürüb. O, arvadının hər gün avtobusla işdən gəldiyi dayanacağın yaxınlığına gəlib və Cəmalənin avtobusdan düşərək dalana keçdiyini görüb. Müxalif ona cəld çataraq saçından tutub, evə qayıtmasını tələb edib. Lakin həyat yoldaşı imtina etdiyindən sonra onu bıçaqlayıb. Arvadı yalvararaq ərinə öldürməməyini desə də, Müxalif daha da aqressivləşərək zərbələr vurub.
Cəmalə ona müqavimət göstərərək dayanacağa tərəf qaçıb. Bundan sonra Müxalif arvadının arxasınca getməyib. O, evə qayıdaraq polis əməkdaşlarının gəlməsini gözləyib. Bir müddətdən sonra polislər gəlib və onu şöbəyə aparıblar.
