Bakıda taksi sürücüsünü bıçaqla hədələyən 3 nəfər saxlanılıb. Bu haqda bu gün, 29 iyul tarixində Report Daxili İşlər Nazirliyinə istinadən məlumat verib.
Hadisə Binəqədi rayonu, Xocəsən qəsəbəsi ərazisində 26 iyul saat 23:00 radələrində baş verib.
3 nəfərin taksi fəaliyyəti ilə məşğul olan “Tofaş” markalı avtomobilin sürücüsü, Masallı rayon sakini Ş.Əliyevi bıçaqla hədələyərək, pul və sənədləri olan pulqabısını götürərək avtomobildən düşürmələri barədə məlumat daxil olub.
Keçirilən axtarış-əməliyyat tədbirləri nəticəsində əməli törətməkdə şübhəli bilinən əvvəllər məhkum olunmuşlar - Abşeron rayon sakini K.Quliyev, Sabirabad rayon sakini A.Həsənov və Bərdə rayon sakini S.Kərimova saxlanılıblar. Faktla bağlı araşdırma aparılır.
